Forskar i arkeologi – Ved Universitetsmuseet i Bergen

Kunnskap som formar samfunnet

UiB skal vere blant Europas fremste universitet, internasjonalt kjent for høg kvalitet i forsking og utdanning. Som samfunnsinstitusjon skal vi bidra til ei berekraftig og demokratisk utvikling og vere ein attraktiv og inkluderande studie- og arbeidsplass.

Video:

Om stillinga:

Universitetsmuseet i Bergen har forsking, samlingsforvaltning og formidling som kjerneoppgåver, saman med innsamling, dokumentasjon og vern. Museet har fagfelta antropologi, arkeologi, kunst- og kulturhistorie, botanikk, geologi, zoologi og paleobiologi. Til museet ligg og ansvaret for utgravingsverksemda etter Kulturminnelova med forskrifter, samt ansvaret for tre botaniske hagar. Universitetsmuseet har omfattande vitskaplege samlingar og er eit nasjonalt formidlingssentrum. Museet har om lag 155 årsverk. Nærare informasjon om museet finn ein her: http://www.uib.no/universitetsmuseet

Forskar – saksbehandlar i arkeologi

Ved Universitetsmuseet i Bergen, Avdeling for kulturhistorie, Fornminneseksjonen, er det ledig ei fast stilling som forskar (SKO 1109) i arkeologi. Stillinga er knytt til den lovpålagde utgravingsverksemda ved Universitetsmuseet i Bergen.

Fornminneseksjonen og Forskingsseksjonen utgjer Avdeling for kulturhistorie. Fornminneseksjonen har ansvaret for forvaltningsinitierte arkeologiske undersøkingar i Universitetsmuseet i Bergen sitt distrikt (Vestland og Sunnmøre). Seksjonen er elles rådgjevar for Riksantikvaren, fylkeskommunane, Sametinget og andre samarbeidspartnarar. Fornminneseksjonen har fire fast tilsette forskarar og 17 administrative stillingar i tillegg til mellombels tilsette knytt til ulike forvaltningsprosjekt.

Arbeidsoppgåver:

Vi søkjer ein forskar med solid kunnskap om førhistoria og brei erfaring frå arkeologiske forvaltningsprosjekt i Noreg eller Norden. Til stillinga ligg fagleg rådgjeving og sakshandsaming av dispensasjonssaker etter Lov om kulturminner. Den som får stillinga vil ha omfattande kontakt og samarbeid med kommunar, fylkeskommunar, Riksantikvaren og eksterne aktørar. Formidling, rådgjeving og fagleg informasjon til forskarar, studentar og publikum inngår og som ein del av arbeidet.

Arbeidsoppgåvene vil og inkludere utarbeiding av planar og budsjett, samt prosjektleiing for arkeologiske forvaltningsprosjekt. Dette omfattar det faglege og administrative ansvaret for førebuing, gjennomføring, rapportering og avslutting av utgravingsprosjekt. Andre administrative og museale arbeidsoppgåver ved seksjonen kan og leggast til stillinga.

Stillinga inneber krav til fagleg kompetanse og føreset kontinuerleg oppdatering på regional forskingsstatus samt eit særleg fokus på arkeologiske metodar og det tverrfaglege og naturvitskaplege feltet. Samarbeid med dei naturvitskaplege fagmiljøa ved Universitetsmuseet er viktig. Det er venta at den som vert tilsett bidrar positivt inn til dei eksisterande forskingsmiljøa ved museet. Den som vert tilsett må rekne med eigen feltdeltaking og stillinga vil medføre mykje reising.

Kvalifikasjonar og eigenskapar:

Kvalifikasjonskrav

• Ph.d.-grad eller tilsvarande kompetanse i arkeologi
• Brei arkeologisk felterfaring og bakgrunn frå relevant prosjektleiing
• Erfaring med vitskapleg publisering, prosjektrapportering og formidling
• God formuleringsevne, munnleg og skriftleg, på norsk (eller skandinavisk) og engelsk. Stillinga krev offentleg sakshandsaming på norsk, og den som vert tilsett må kunne sakshandsame på norsk innan rimeleg tid. Søkjarar som ikkje kan norsk ved tilsetting, må forplikte seg til å oppnå nivå B2 i norsk innan tre år (UiB tilbyr norskopplæring)

Søkjarens erfaring knyt til leiing, gjennomføring og rapportering frå arkeologiske utgravingsporsjekt samt erfaring frå saksbehandling vert tillagd vekt ved vurdering.

Vi ser det som ein føremon at søkjar har:

• Oppdatert kompetanse på ulike arkeologiske og naturvitskaplege analysemetodar og erfaring frå tverrvitskapeleg samarbeid
• Erfaring med sakshandsaming og rådgjeving knytt til kulturminneforvaltning
• Vitskapleg produksjon knytt til data frå den prosjektbaserte verksemda
• Kjennskap til kulturminneforvaltninga generelt og museal erfaring
• Oppdatert kompetanse innafor relevante dokumentasjonsmetodar, digital arkeologi og GIS
• Heilskapleg forståing av forvalting, forsking og formidling
• Førarkort for bil

Personlege eigenskapar:

• Vere dugande til å levera i høve til tidsfristar og kvalitet
• Vere løysings- og samarbeidsorientert
• Kunne arbeide planmessig og sjølvstendig
• Bidra til eit godt arbeidsmiljø og samarbeidsklima
• Det er vesentleg at den som vert tilsett er godt eigna for stillinga, difor vert personlege eigenskapar og samarbeidsevner vektlagt i vurderinga

Vi kan tilby:

• Eit godt og fagleg utfordrande arbeidsmiljø
• 20% av stillinga er tillagt eigen forsking
• Stilling som forskar (kode 1109) kr 720.000 - 760.000 per år etter erfaring. For særleg kvalifiserte søkjarar kan det verte aktuelt å vurdere høgare løn
• Medlemsskap i Statens Pensjonskasse
• Stilling i ei inkluderande arbeidslivsverksemd (IA-verksemd)
• Trening i arbeidstida
• Gode velferdsordningar

Søknaden skal innehalde:

• Søknadsbrev som beskriv kvalifikasjonar og motivasjon
• CV
• Vitnemål og attestar
• Namn og kontaktopplysningar til to referansar
• Komplett publikasjonsliste
• Oversikt arkeologisk felterfaring og rapportar frå arkeologiske utgravingar
• Liste over innsendte vedleggi kva for form vitskaplege arbeid skal sendast inn)

Søknaden skal innehalde ei kortfatta framstilling av utdanning, tidlegare stillingar, vitskapeleg-, fagleg- og administrativ erfaring. Faglege/vitskapelege arbeid skal ikkje sendast inn saman med søknaden. Som eit første ledd i vurderinga vil det bli brukt ein sorteringskomité som vurderer alle søknadene. Dei best kvalifiserte søkjarane vil bli bedne om å sende inn eit utval vitskapelege arbeid, som vil bli vurderte av ein eigen sakkunnig evalueringskomité samen med andre relevante kvalifikasjonar. Dersom det er felles arbeid, må søkjaren legge ved ei kort utgreiing om eigen medverknad og rolle. Kandidatane vil bli bedne om å sende inn maksimum tre vitskapelege arbeid som søkjaren ser på som særleg relevante for stillinga.

Søknad og vedlegg med attesterte omsetjingar til engelsk eller eit skandinavisk språk må lastast opp i Jobbnorge.

Generell informasjon:

Utfyllande opplysningar om stillinga kan ein få ved å vende seg til: seksjonssjef ved Fornminneseksjonen, Morten Ramstad, tlf. 40 61 00 70 e-post: morten.ramstad@uib.no eller til instituttleiar Björn Nilsson, tlf. 41 24 69 13, e-post: bjorn.nilsson@uib.no.

Mangfald er ein styrke og gjer at vi kan løyse oppgåvene våre endå betre. UiB treng difor kvalifiserte medarbeidarar uavhengig av kjønn, etnisitet, religion, livssyn, funksjonsnedsetjing, seksuell orientering, kjønnsidentitet, kjønnsuttrykk og alder.

Vi oppmodar kvinner om å søkje. Dersom fleire søkjarar har tilnærma like kvalifikasjonar, gjeld reglane for moderat kjønnskvotering.

Universitetet i Bergen nyttar meirinnsyn ved tilsetjing i vitskaplege stillingar.

Opplysningar om søkjaren kan bli gjort offentlege sjølv om søkjaren har oppmoda om ikkje å bli ført på søkjarlista. Dersom oppmodinga ikkje blir teke til følgje, skal søkjaren varslast om dette.

Vi oppmodar søkjarar med funksjonsnedsetjing, innvandrarbakgrunn eller hól i CV-en til å søke. Dersom du kryssar av for dette i søknaden kan du bli positivt særbehandla. Vi inviterer alltid minst ein kvalifisert søkjar frå kvar av desse gruppene til intervju.Nærare om tilsettingsprosessen her.