Avdeling for aktivitet og re/habilitering i Eining Tenester til heimebuande i Stord kommune har kontor sentralt i Leirvik. Avdelinga er ein aktiv og spennande arbeidsplass i tett samarbeid med andre ergoterapeutar, ulike fag og yrkesgrupper. Me kan tilby varierte oppgåver i eit tverrfagleg miljø. Vår visjon er at fleire er aktive og sjølvstendige i eige liv.
Det er ledig eit vikariat i 100% stilling for ergoterapeut i tidsrommet 01.09.26 - 01.07.27, med moglegheit for forlenging.
Stillinga inneber arbeid både med born og vaksne i Stord kommune, og gir høve til varierte og utviklande arbeidsoppgåver. Arbeidsområdet er retta mot rehabilitering, førebygging og behandling, og omfattar mellom anna tilrettelegging av bustad og omgjevnader, ADL- og funksjonstrening, samt hjelpemiddelformidling m.m. Tenestene vert gitt både individuelt og i grupper.
Ergoterapeuten har koordinatorrolle i enkeltsaker.
Ergoterapeuten skal bidra i eit tverrfagleg, samordna og samhandlande tenestetilbod, og arbeide med ulike brukargrupper og varierte arbeidsoppgåver. I arbeid med born vil samarbeid med mellom anna foreldre, barnehage og skule vere sentralt. Me ynskjer ein kollega som er fleksibel, nyskapande og løysningsorientert, med gode samarbeids- og kommunikasjonsevner.
Erfaring frå kommunal og/eller annan relevant ergoterapiteneste
Erfaring med hjelpemiddelformidling
Erfaring og/ eller interesse for rehabilitering
Erfaring og/eller interesse for arbeid med born
Er ansvarsbevisst, nøyaktig og strukturert
Har høg arbeidskapasitet, er påliteleg og arbeider sjølvstendig
Det vert lagt særskilt vekt på personlege eigenskapar.
Autorisert ergoterapeut, men ergoterapistudentar som fullfører utdanninga i juni er også velkomne til å søkje.
Gode norskkunnskapar, både skriftleg og munnleg
Førarkort klasse B.
Det må og leggast fram godkjent politiattest av nyare dato
Varierte arbeidsoppgåver i eit tverrfagleg fagmiljø
Eit positivt og inkluderande arbeidsmiljø.
Engasjert i fagutvikling og kunnskapsbasert praksis.
Evne til å sjå heilskap og bidra til løysingsorientert arbeid.
Stord ve og vel med moglegheit for leige av leilegheiter i Røldal, Husøy med båt og utleige av tilhengarar mm.
Løns- og arbeidsvilkår i samsvar med kommunalt avtaleverk
Offentleg tenestepensjon
Dersom søkjar ynskjer å verta unnateke frå offentleg søkjarliste, må det grunngjevast. Opplysningar om søkjaren kan bli offentleggjort, sjølv om søkjar har bedt om ikkje å verta oppført på søkjarlista. Søkjar vert varsla dersom ynskje om reservasjon ikkje vert teke til fylgje.
Stord kommune er ein industrikommune i Hordaland med ca. 19 000 innbyggjarar. Det er stor og variert aktivitet både i arbeidsliv og for fritid. Me har eit rikt kulturliv og det er gode vilkår for idretts- og friluftsliv. Her er flott natur med skog, sjø, vatn og fjell som ligg nær til for trivlege opplevingar og aktivitetar ute. Det er god kommunikasjon til Haugesund, Stavanger og Bergen. Barnehagar og skuleverket har god kvalitet. Me har m.a. vidaregåande skular, allmenn- og førskulelærar-, sjukepleiar- og ingeniørutdanning. Stord sjukehus er lokalsjukehuset for 50000 innbyggjarar i regionen Sunnhordland.